Disruptive Sequence
دي حاجة بتحصل لاي حد مننا ، مالهاش وقت محدد ولا مكان محدد، تعالوا نشرحها بتفصيل اكتر، فيه نظرية اسمها ال 20/80 او ال 20% -80 %. النظرية دي اتكلم عنها ستيفن كوفي ف بداياته و هيا ان 80% من اللي بيحصل ف حياتك و انت مش مسئول عنه هو ف الحقيقة سببه نتايج ال 20% من حياتك اللي انت مسئول عنها، يعني مثلا صاحي الصبح يومك حلو و فجأة القهوة اتدلقت علي هدومك ف البيت بسبب حد م الولاد - ده كلام كوفي- رد فعلك تجاه دلق القهوة علي هدومك هو اللي بيتحكم ف 80% من بقية اليوم، لو اتعكننت و صبيت غضبك ع الولاد او المدام او يوم زفت، هتكون النتيجة ان بقيت اليوم هيكمل كده و هيكون عندك استعداد نفسي ان بقية اليوم يكون وحش، و بالفعل هيكون وحش. لو بقي رد فعلك كان هادي و ماحصلش حاجة و علي طول غيرت هدومك و استحملت توتر التأخير، بقية اليوم هيكون عادي جدا ، يمكن اي مشاكل هتستقبلها في بقية اليوم هتكون بسيطة. لحد هنا و كلام كوفي خلص.
طيب ال disruptive sequence بقي هو ايه ، هو مدي تأثرك بحاجة بسيطة جدا تخليك تتخذ قرارات مصيرية تاثر علي حاجات كتير، مش مجرد انفعال من دلق قهوة. لان ف دلق القهوة ده رد فعل انفعالي وتأثيره هيستمر لساعات و بالكتير يوم، لكن ال disruptive sequence بيستمر ف بقية حياتك. كمثال، عارفين تتابع قطع الدومينو لما كانو بيحطوها ورا بعض و يعملوا مباني و اشكال بيها و بمجرد ما يوقعوا قطعة واحدة نلاقيها بالتتابع sequence دمرت اشكال مبنية اخدت ساعات و ايام، طبعا السقوط التتابعي للدومينو ده مشهورة جدا و ليه فيديوهات علي النت .
اهو شيل بقي قطعة الدومينو الاولي اللي هتقع دي و حط مكانها انت: مثلا واحد اتخانق مع مديره، واحد اتخانق مع خطيبته ، واحد حد حكله العربية ، راح نازل متخانق معاه . اهوه ده قطعة الدومينو بالظبط، المشكلة بقي انك ف تتابع سقوط الدومينو انت عارف بقية القطع هتقع ازاي و هتعمل ايه، لكن ف حياتك لما انت تكون المثال، انت ماتعرفش اصلا هتوصل لفين. و ده برضو شبيه ب ال butterfly effect, اللي كمثال ف الطبيعة لما مياه المحيط تغيرت درجة حرارتها ادي لتغير حرارة تيارات بحرية، ده عمل ظاهرة النينو اللي عملت اعاصير و تغيرات مناخية ماحدش ابدا كان يتوقع حدوثها. اهو ده بقي ال disruptive , لأنه بيغير ف طبيعة الحاجة اللي متعودين عليها ب تتغير تماما و تبقي تأثيرها عنيف. بالظبط كده زي واحد زنق عليك بالعربية رحت شاتمه ، كسر عليك و نزلتم اتخانقتم مما ادي انك تصاب بعاهة او رد فعلك و حالتك النفسية كانت سيئة روحت مطلعها فيه ف موته ، كده حياتك كلها اتغيرت تماما. او اخدت قرار انك هتسيب الشغل فجاء لانك ف لحظة ما طيقتش كلمة مديرك ، او جبت اخرك زي ما بيقولوا. لما نرجع ل موضوع السقوط التتابعي لقطع الدومينو نكتشف انك ممكن ف لحظة تشيل قطعة ف النص بعد بدأ التساقط ف يتوقف التتابع. و هنا بقي يكون السؤال انهي قطعة و امتي. اهو ده بالظبط الي ممكن تعمله ف الحقيقة ، ازاي تلحق توقف ال disruptive sequence قبل ما يتعدي نقطة الاعودة. و ده ممكن جدا لو ف لحظة وانت هتنفعل و هتضرب او تشتم اللي زنق عليك لو فى اللحظة دي سئلت نفسك انا عايز ايه؟ عايز انتقم ؟ اعرفه غلطه؟ اطلع اليوم الزفت ده علي دماغه؟ و بعدها علي طول و بعد ما هعمل كده هاستفيد ايه؟ ربيته ؟- ماحدش بيربي حد غير اهله - لازم توصل لاجابة هتكتتشف ان مافيش اجابة مقنعة لانك مش شايف توابع ده ولا عارف هتوصل لفين. الانتقام و التشفي هما أوضح مثال علي ال disruptive sequence . بتاخد قرارات غير محسوبة و حتي لو فاكر انها محسوبة بس برضو توابعها غير محسوبة لأن دي فيها نظرية احتمالات كتير جدا.
علشان تتحكم ف التأثير التتابعي التدميري او التشويهي لازم ف لحظة دقيقة جدا تاخد قرار مغاير تماما لتتابع الاحداث، لازم تشيل قطعة الدومينو اللي هتضخم تأثير سقوط بقية قطع الدومينو. طبعا فيه ناس تقولك كمثال لو متخانق فى البيت بعد شوية هترجع و تروق ، بس للأسف لازم بيكون فيه فرق، تمام زي ثقتك ف حد بتاخد سنين علشان تبنيها بس ف لحظة بتفقدها . بتقعد ساعات تحط قطع الدومينو ورا بعض بس ف لحظة كله بيتهد. طب نتفادي ازاي ان التأثير يتفاقم و يبقي زي ال chain reaction , طبعا الموضوع مش سهل بس اول حاجة تقف للحظة و تسئل نفسك انا عايز ايه و هاستفيد ايه و هتحمل تكلفة اللي هيحصل بعد كده، و انت اصلا مش عارف ايه اللي هيحصل و نهايته فين و لا حتي عارف حجم تأثيره عليك. و السؤال الاهم بقي، تعرف تعمل تأثير مغاير تماما ولا لا ، الحقيقة ان ده ممكن بانك تفكر باستراتيجية متقذمة غير منفعلة بمعني انك لازم تتقبل الموقف السئ بسرعة و تعدي مرحلة الصدمة.
الانسان اول ما بيتعرض لصدمة بيمر بعدة مراحل اولا مرحلة الانكار (انه مش مصدق ان ده يحصل) ثم مرحلة الغضب (ازاي ده حصل ) ثم مرحلة الاعتراف بالواقع ثم مرحلة تقبل الواقع و التعايش معاه . قطعة الدومينو اللي لازم تتشال هي (مرحلة الانكار و مرحلة الغضب ) لازم علطول تقفز لمرحلة تقبل الواقع و مرحلة التعايش معاه. لان مرحلة التعايش بتتيح ليك التفكير باسلوب متقدم بيدفعك انك تبحث عن حلول توقف ال disrubtive sequnce ده.
و دايما خليك فاكر ان طريقة تعاملك مع المفاجئات هي اللي بتحدد النهايات و بتديلك فرصة تتوقع النهايات و كمان توظفها تكون ف صالحك قبل ما توصلها. حد فاهم حاجة ؟
