فن الاستمتاع بالحياة: الجزء الثالث - الاكل ف الريستوران

آلاستمتاع بالاكل في الريستوران 

الحاجة التالتة: فن الاستمتاع بالأكل ف الريستوران او المطعم، جربته ، عيشته بجد ولا اكلة و خلاص ، كلام علي تربيزة و تدفع الحساب بتروح انهي مطعم ، بتحب انهي نوع م الاكل ، سيت مانيو ولا  اللي علي مزاجك، بتحب الخدمة بشياكة ولا هات الاكل وخلاص

، في اهتمام بيك، ازاي؟ مستوي الخدمة، جودة المكونات، ترتيب الترابيزة ،شكل القعدة، تنوع قايمة الطعام ، ايه احسن حاجة ، هتجرب حاجة جديدة ولا اللي تعرفه احسن مالماتعرفوش، هتروح غدا ولا عشا ، هتفرق ف نوع الاكل، عازم ناس ولا مع العيلة و لا لواحدك، جعان اوي ولا نص نص، طب بتحب انهي مطبخ ، ايطالي، لبناني ، طب رايح علشان ميت م الجوع ولا رايح تنبسط ، هتدوق قبل ما تاكل و لا مافيش الكلام ده، عارف هتطلب ايه كويس ولا علي حسب لللي موجود، اسئلة كتيرة اوي؟

و اذواق مختلفة و مطاعم مختلفة ، مكونات مختلفة، حتي جو كل مطعم مختلف، هتجرب ايه ولا ايه و هتستمتع ازاي و تختار المطعم ازاي و تنبسط مش شرط نكون ناس اكيلة بس كل تفصيلة هي جزء مهم اوي من تجربة الاكل ف المطعم ، و لما بتحاسب عليها انت بتحاسب علي كل حاجة مش بس اكلك يعني الخدمة لو وحشة بس الكل حلو هتبقي برضه متضايق ، علشان كده كل حاجة من حقك تكون احسن حاجة حتي الشوكة اللي بتاكل بيها بتحاسب عليه طيب ازاي و الواحد مش طباخ شاطر ولا يفهم ف المطاعم يقدر يختار مكان كويس و لما يروحه ينبسط و يستمتع ب كل حاجة فيه من غير مايحس انه انضحك عليه اول حاجة تفكر فيها انت خارج معزوم ولا عازم، طبعا معزوم ف انت مالكش يد ف المكان اللي رايحه بس ممكن تحاول تعطي اقتراحات، اما لو انت اللي عازم فانت بقي صاحب كل حاجة فلازم الاختيار بكل تفاصيله يكون تجربة حلوة اوي. و بالتالي دي عزومة غدا  ولا عشا ، لان كل واحدة تختلف عزومة الغدا ف الاجازة ف مطعم تختلف تمام لو اثناء الشغل، ف خلينا ف يوم اجازة جميل قررت تتغدي بره ، و عازم حد معاك 

 اول حاجة هي اهم حاجة تسئل اللي معاك بيحب اكل ايه ، و لازم يختار ، ماينفعش اي حاجة ، لو قالك اي حاجة يبقي جعان يا معلم و مش فارقة معاه بس خلصه عادة الغدا ف مصر الساعة تلاتة ، بره الساعة اتناشر ، ف ميعاد العزومة لازم يكون مظبوط علي الضيف ، ثانيا ، لو سابلك حرية الاختيار يبقي اوكي اختيار المطعم بقي سهل اوي عن طريق النت، اسئل اصحابك الاكيلة عادة العالم دي هيدوك رأي كويس ٥٥% بس لان ال ٤٥% هتكون تفاصيل المطعم .الأكيل يحب الاكل بكميات و الاكل الطعم بس ماتفريقش معاه اوي الترابيزة عليهاةمفرش ، جايبين له شوك كفاية، المطعم دوشة ، القاعدة نص نص، والصراحة ده واحد أكيل ، تفاصيل ايه اللي يركز فيها ، طالما الاكل حلو يبقي خلاص خلصت. بس انت رايح تستمتع مش تملي الحصالة و السلام . المهم لو قررت تشوف من ع النت ، و ماله عندك سايتس كتير اوي، ركز ف الريفيوز بتاعت الناس trip advisor,  و جوجل عاملين شغل لطيف ، بس مش شرط تلاقي كل مطاعم مصر عندهم، المهم شوف الناس بتقول ايه ف تلات حاجات مع بعض: الخدمة، جودة الاكل، نضافة المكان، لو دول اوكيه ماشي، لو ناقصين لأ .طبعا مش هتكلم عن انواع الكل لان الناس اذواق، في اللي بيحب الاسماك و في اللي بيحب المشاوي، ف مش ده اللي هنركز فيه لان ده عالم الطبخ سعادتك. خلاص قررت المكان، كلمهم احجز ترابيزة ، و اسئلهم عن الاماكن المميزة عندهم اعرف كل حاجة و اختار مكان حلو طبعا علي حسب الموقع و ترتيبه.

 تجربة الاستمتاع بتبتدي من اول مكالمة الحجز، وصلت المكان ف الميعاد و كله تمام ركز بقي ف اللي جاي، في حد بيفتحلك باب الريستوران ولا بتقف مستني؟ بيجيلك مسئول الحجز فورا ولا بيتأخر ؟ بيضحك ف وشك ولا قرفان ، اللستة قدامه جاهزة ولا لسه هيدور، طبعا بمجرد وصولك المفروض يقعدك علي طول ، انت حاجز، طيب اول حاجة ركز ف الجو العام للمكان ، دوشة زي الفوود كورت ولا هادي شوية. خالي بالك احنا ما بنكلمش علي فوود كورت او فاست فوود. لان دول حاجة تانية خالص، دول ادخل اظلط و روح و مش مهم حتي انت بتاكل ايه. نرجع للريستوران بتاعنا بقي، الجو العام لازم يكون هادي تسمع اصوات معالق و شوك ماشي ، ناس بتضحك ماشي، لكن اللي بيقدموا الطلبات يندهو علي بعض او الزبائن صوتها عالي من النده علي متلقي الطلبات كده لا.الجو العام لطيف، هتدخل تقعد علي الترابيزة ، المفروض هتقعد السيدات الاول و بعدين تقعد انت، لو مكان شيك اوي، اتنين هيجوا يحركو ليكم الكراسي علشان تقعدوا ، ف مش محتاج تحرك الكرسي للسيدة اللي معاك. التجربة بتبجي حتي من طريقة جلوسك مع شريكك ع الترابيزة، بعد كده المنيو بتتقدم بعد دقيقتين لخمس دقايق ، مش اول ما تقعد تلاقيها ف وشك، المطعم الشيك بيسيب الزباين تاخد نفسها و ممكن يقدم لهم فوط مبللة لغسل اليدين قبل المنيو ممكن كمان يسئلهم لو يحبوا يشربوا مياه ف الاول،عادة الجو بيتحكم ف اذ كانت المياه مثلجة ولا لأ.

المهم المنيو بتتقدم ف ايدك مش بتتحط ع الترابيزة.و كمان ممكن يقولك الاصناف الموجودة ف المنيو و يفتحهالك علي الصفح بتاعتها، انت مش جاي تقرا كتاب انت جاي تنقي، لازم يدلك طبعا. الاجانب بيسئلهم عن نوع المشروب ف الاول و بيقدم لهم منيو الكحوليات، و انت بتبص ع المنيو ركز ف ترتيب الترابيزة مكان الشوك و السكاكين و المعالق، محطوطة full set,  ولا بس لل starter، دي مدرستين الحقيقة في مدرسة بتحط كل الشوك و المعالق مرة واحدة و مدرسة تانية بتحط كل حاجة مع الطبق بتاعها، مش هيفرق معانا اوي، بس لو الطبق بتاع الوجبة كبير هيتم توزيع ادوات المائدة من تاني،

 عامة الملحوظة اللي تهمك هي ف الآتي: ادوات المائدة مخربشة ولا بتلمع، طقم واحد ولا اطقم كتيرة السكينة متهانة ولا شرشرتها كويسة، الشوكة سنانها متنية ولا مظبوطة، دي كلها علامات اصحاب المطاعم الشيك بياخدو بالهم منها

، حاجة تانية مهمة المتردوتيل و هو بيحط ادوات المائدة لو ماكنتش محطوطة ، بيحطها ازاي و من انهي ناحية ، بيستأذنك ولا بتلاقي ايد بتهبط زي الطبق الطائر من فوق .طبعا مش شرط الفوطة تكون متطبقة علي هيئة شكل جمالي، المهم تكون نضيفة و ناعمة و منشية شويتين و طبعا مش مفتلة، ف متركزش اوي ف طريقة تطبيقها عليالترابيزة. شوف ف النص محطوط ايه ، شمعة ولا وردة ولا اختراع خاص بالمطعم، طبعا كل مطعم بيحط حاجة تميزه، ركز بس ف الحاجة دي معتني بيها ولا لأ لو وردة ،طبيعية ولا صناعي و عليها تراب، لو شمعة نضيفة وحلوة ولا ملحوسة، ولو اختراع خاص بالمطعم منضفينها ولا مفككة من بعضها، تفاصيل الترابيزة دي جزء م التجربة، المطاعم الفخمة المنيو بتكون اصناف الاكل فيها قليلة، مش معني كده ان اللي حاطط انواع كتير وحشة ، بس كل م المطعم كان راقي كل ما الشيف بيكون متخصص اوي و محترف ف اصناف معينة ، و عادة ده بيكون ما السيت منيو. المهم هتنقي الشوربة او الاسترتر اللي علي مزاجك المفروض يجيلك ف خلال اقل من خمس دقايق ، لان الشوربات بتكون جاهزة، السلطات برضه مش محتاجة اكتر من خمس دقايق، اي حاجة تانية ممكن تاخد وقت اكتر  الاهتمام بالتفاصيل مهم جدا ، و معلش مش هتلاقي مطعم مهتم بكل التفاصيل اللي ذكرتها و ف الاخر تاكل منه و تتعب، علشان كده الفخامة و الشياكة ف تفاصيل المطعم مش مسئلة غلو سعره او بيتقال عليه فخم، انت اللي تقدر تحدد

 نرجع بقي للتفاصيل، الشوربة بتتقدم ف طبق مناسب للكمية و عادة ما بتكونش كمية كبيرة ، لا مظبوطة علشان اللي بعد كده، و طبعا ف المعتاد بيتقدم مخبوزات مع قطعة زبدة ف البداية، و.دي بروتوكول اصله اجنبي ف بالتالي مش محتاج تحكم ع الجزئية دي، المهم بعد الشوربة المفروض بيتشال الطبق من ناحيتك الشمال ،الطبق يتقدم من الناحية اليمين ويتشال م الشمال لاحظ ان الفوطة غرضها الاساسي ان الاكل ما يوسخش هدومك، ف انت حر تحطها عليك بالطريقة اللي تعجبك ، وعلي فكرة الفوطة لو اتوسخت من حقك تطلب واحد تانية عادي جدا،  الطبق الرئيسي بيتقدم بعد م طبق الشوربة يترفع من ع الترابيزة بحوالي خمس دقايق او اقل، لان المفروض انه بيتجهز اثناء ما انت بتشرب شوربتك، مش هتكلم عن ماسكة معلقة الشوربة بس حضرتك بتشرب م المعلقة من بوزها مش من جنبها ساعدتك، و طبعا من غير صوت، سخنة سيبها تبرد حضرتك مش معقول هتهتم بالتفاصيل دي كلها و هدوء المكان و يبقي طريقة شوربك للشوربة هي الصوت المسيطر ع المكان يعني :) المهم. انواع الشوك و السكاكين بتختلف باختلاف نوعية الاكل، و دي سهلة تعرفها من علي النت، ف طبيعي يتغير طقم المائدة بناءا علي نوع الاكل ف الطبق الرئيسي ، بس ملحوظة مهمة لو بتاكل ستيك بيتقدملك سكين ستيك، للااسف تلات اربع المطاعم بتحطلك سكينة مطبخ علي انها ستيك مع انك مش هتدبحه ده انت هتقطعه بس طبعا لو عايز تجرب المطعم بجد ، جرب حاجة جديدة اسئل المتر ايه الصنف اللي انتم متخصصين فيه او ايه طبق الشيف ، المفروض و لازم يقولك . لو قالك كلهم حلوين يبقي مافهمش السؤال اصلا. و لما يقولك الصنف اسئله معمول ازاي ، و اي السايد اللي معاه ، المفروض الطبق ده سمعة المحل علشان نستوعب فكرة طبق المحل ، فيلم حلو اوي اسمه Brunt , بيتكلم ازاي الشيف عنده هوس بطبق المحل و مدي تميزه، هو فيلم دراما . المهم ، لو طبق الشيف كانت مكوناته عجباك او مافيش حاجة فيه انت بتكرهها جربه طبعا ، مش هتدخل ريستوران بتشوف ادق التفاصيل فيه علشان ف الاخر تطلب برجر.المطاعم المحترمة مش بتقدم اكلات بروسيسيد فوود ، يعني مافيش برجر و سوسيس و العك ده، انت داخل علشان تستمتع مش تاكل junk food . و نصيحة كل مطعم له مطبخه ، يعني مش هتبقي ف مطعم ايطالي تقول لهم عايز ملوخية ، و مش شرط يكونوا متميزين ف الباستا مثلا ، بس الاكيد بيكونوت متميزين ف صوصات معينة او ف عجينة البيتزا ، و بالمناسبة الباستا سرها ف الي بيتحط عليها و طريقة تجهيزه مش ف نوع المكرونة يعني. الاسباجتي اسهلهم .

المهم ، السلطة الخضرا طبعا لازم يكون ورقها طازة مافيهوش حتت صفرا ، لو لاقيت حتت خص او طماطم مش طازة اطلب تغيير الطبق طبعا.المهم ، كل طبق من حقك تطلبه احسن ما يكون، لو الاكل ملحه كتير او قليل و مش علي مزاجك من حقك تقول للمتر خلي الشيف يدوق الطبق، ما تعتمدش ان المتر هيدوق و هيعرف ، المتر زيه زي اي واحد، لكن الشيف عارف هو عامل ايه، و طبعا المفروض ان المتر بينده الشيف من جوه علشان يدوق، ما ينفعش ياخدله الطبق جوه ، لو اخدوا الطبق جوه يبقوا ملزمين يجيبولك طبق تاني بداله، و طبعا الشيف بيجيب معلقة او شوكة تانية غير بتاعتك، مش هنعك كمان.المهم لو الاكل كان تمام و عجبك ، بتقدر تسيب انطبامك عن الاكل باستخدام الشوكة و السكينة والمفروض المتر قبل ما يشيل الطبق يقرا اللي انت عامله لو الاكل كان حلو بتحط الشوكة و السكينة متوازيين علي الطبق ، لو الاكل ماعجبكش بتحطهم cross يعني متقاطعين زي علامة اكس.

 و ركز بقي المتر فاهم كويس و هيقرا الطبق و يقولك ايه مشكلة حصرتك ولا هيشيل الطبق و كأن مافيش حاجة اصلا. علي فكرة لو عمل كده يبقي المتر مش متدرب ع الشغلانة و ممكن تطلب الشيف، و لاحظ حاجة الاكل لو مش عجبك من اول قطمة تقدر تغيره لاكن تخلصه كله و عايز تغيره ما ينفعش طبعا. المهم استمتع لو عجبك الديسيرت طبعا له طقم مائدة كامل لوحده و اي حاجة تطلبها المفروض تحيلك ف اقل من خمس دقائق الا لو كان هوت ديسيرت ده بياخد ربع ساعة للتحضير. طريقة رفع الأطباق من علي الترابيزة لازم تكون بشياكة و مش مفروض يوزع بقايا الكل ف طبق واحد علشان بعرف يشيلهم ، ده اسمه عفانة. لان العادة بعد الاكل بيبقي الواحد شبعان ف ما بيستحملش يشوف الاطباق و بقايا الاكل بيعاد توزيعها، المفروض بيجيب صينية يحط الأطباق عليها لرفعها.من حقك تقعد بعد الاكل نص ساعة مش اكتر ، اول مع الديسيرت ساعة كمان، لأن المطعم ده مش كاجوال يعني مطبخه له مواعيد ، ملحوظة مهمة معظم.مطاعم مصر كاجوال ، بينما مطاعم الفنادق مش كاجوال، لان المطبخ و الوجبات مواعيدها محددة يعني مش مسئلة خلص و قوم علشان اللي بعدك يعد. لو عايزين يسئلوك الاكل اخباره ايه ، المفروض بيسئلك ف اول معلقتين ، مش تخلص الطبق كله و يسئلك الاكل اخباره ايه، م الطبق اتمسح اهوه ياعم انت :) ف ساعات المتر بيحاول يكون لطيف بس ف الوقت المش مناسب بتدل علي قلة خبرة، لما تحب تنده للمتر ، طرقعة الاصابع مش عيب علي فكرة، هي افضل م النده بس لو محرج مضطر تنده و تقوله يا متر ، لو عمل نفسه مش سامعك ، دي قلة ذوق ، و لو سمعك المفروض يعمل أي كونتاكت و يهزلك راسه حتي لو مشغول .المكان كله ملكك ف الوقت ده، لو موسيقي مزعجة من حقك تطلب تغيرها، انت بتشتري الوقت ف المكان مش بتشتري الناس اللي بتخدمك، يعني خليك راقي ف التعامل معاهم، و مع اي اختلاف ما ينفعش تزعق، تكون هادي بس حاسم ف طلبك، استمتع ب كل حاجة كلها بمزاج ، استطعم الحاجة قبل ما تظلطها و خلي اللي معاك ينبسط ، و ما تحرجش من اي تعديل ف الاكل طالما ماكلتوش ،بس ماتغيرش الطبق بعد ما يكون جالك

 ، بالمناسبة اليابانيين عملوا حاجة حلوة اويبيحطوا نماذج طبق الاصل من الاطباق ف فاترينة المحل ف انت عارف شكل طبقك ايه و حابب اللي فيه ولا لأ، زي الصورة اللي صورتها دي

خلصت و قررت تحاسب، بتحط البقشيش علي حسب مدي رضائك مافيش قاعدة علي فكرة لل tips بس لو انت لارج ف الحالة دي بتكون متناسبة مع الفاتورة المهم انت لازم تكون انبسطت بكل تفصيلة المكان ، القعدة ،الاكل ، الخدمة، المتر بيخدم عليك بابتسامة واحترام، الموسيقي، درجة التكييف، درجة سخونة الاكل ، نضافة ادوات المائدة، المفرش، الفوطة، الاكل من اول المقبلات لحد الحلو، طريق وضع و شيل الاطباق ، حتي تفاصيل الفاتورة ، واضحة فيهاةحاجة مش مظبوطة، لو استمتعت بكل ده هتدفع و انت مبسوط و مش هيكون في اي توتر لحظة الحساب، المهم التفاصيل تعيشها كلها ، و بألف هنا و شفا.

فن الاستمتاع بالحياه : الجزء الثاني - الشيكولاتة

 الشيكولاتة‏

ايه رأيكم ف الشيكولاته، بتحبها ، اد ايه، بتحب تستمتع بيها و انت بتاكلها، اي نوع شيكولاتة بيعجبك، جربت انواع كتير ، بتنزل تنقي بمزاج ‏ ‏بتحب تدوق قبل ما تشتري من محل الحلويات، بتركز ف التغليف، بتحب تجيبها و انت مسافر، ممكت تدفع فيها فلوس كتير، بتاكلها ازاي حتة حتة ولا بق واحد ‏بتحبها سايحة

، ايه نوع ال filling الي بتحبه، عايزها دارك ولا وايت، باللبن و لا بيور ، ايه الماركات المفضلة ليك، بتجرب تجيبها من بلاد معينة ؟ ‏كل دي اسئلة كل واحد فينا عنده اجابة مختلفة، اذواقنا متعددة بس كلنا بيتفق ان الشيكولاتة حاجة حلوة اوي بتنقلك لاحساس تاني مؤقتا لحد ماتخلصها ‏طب جرب كده مستحيل تكون متضايق او بتزعق و تاكل شوكلاتية و تكمل زعيق و هي ف بوقك:) مستحيل تكون مكشر و احتي بتبكي و تاكلها و تكمل تكشير ‏الشوكولاتة هي السلعة رقم واحد ف الهدايا، فيريرو روشيه لقبوه بصانع السعادة بعد ما عمل النوتيلا اللي هي من الشوكولاتة ، شفت قد ايه بتسعد الناس ‏.

زيكم بالظبط انا كمان بحب الشوكولاتة و اكتشفت مؤخرا اني بمارس فن الاستمتاع بيها من غير ما اخد بالي علشان خلينا نتشارك حاجة بتدخل البهجة علينا ‏و انت بتشتري خد وقتك خالص،  هنكلم الاول علي الماركات العالمية، ناس كتير فاكرة ان سويسرا رقم واحد ف صناعة الشوكولاتة بس ده مش دقيق اوي ‏. بلچيكا رقم واحد من حيث الجودة و نقاؤ الخامة ، يليها سويسرا ثم فرنسا و المانيا ، و هنا انا مش بكلم عن الماركات لا عن الخامات ‏.

جودديفا godiva تعتبر رقم واحد للاسف غالية حبتين بس بتمتاز ب ان مكونتها بتكون من اعلي درجات الجودة و النقاء ، من اكتر من عشر سنين كانت ‏بتتصنع ف بلچيكا بس ، دلوقتي بقيت ف كذا بلد ، الاميركاني منها جودته مش زي البلچيكي ، طبعا كان فيها مكونات مش حلال بس هما واضحين و بيقولوا  ‏اذا كانت بتحتوي علي خمور ام لا، ف تقدر تشتري وانت مطمن بعد ما تقرا.طبعا ناخد بالنا احنا هنا بنتكلم عن assorted  

‏⁦‪
godiva.com/assorted-choco…‬⁩

‏اللي هي شوكولاتة متنوعة كل واحدة منها مصنوعة علي حدة بطرق مختلفة مش ال chocolate bar, وللاسف ال assorted اغلي نوع لانها بتتيح بمذاقات مختلفة ‏و عادة ممكن واحدة او اتنين ما يعجبوكش لان ده عادي ، علشان اذواقنا مختلفة.
بيجي بعدها ماركة Lendt لينديه، هي سويسرية بس مختلفة لانها بتعمل ‏شوكولاتة بار اكتر من الاسورتيد و طبعا حجم انتاجهم مهول و برضه الاسورتيد بتاعتهم غالية، طيب نتكلم بقي عن انت و انت بتشتري ازاي تستمتع ‏لو ف اسواق حرة ف مطار طبعا مش هتعرف تدوق لكن ممكن تختار علي اساس تاني ، طبعا كل ما الوزن بيزيد السعر بيزيد ، ف ايه الوزن المناسب ‏. بص من اول ٨٠-١٢٠ جرام دي مناسبة للسعر لو هتزود السعر هيزيد بعض الناس بتفضل ال ٢٢٥ جرام علشان ممكن كذا واحد يجربها ‏و طبعا ممكن تزود و عبوات القريبة من نص كيلو بس ادفع بقي ياعم.

المهم نقي الوزن المناسب لاحتياجاتك او احتياجات مناسبتك، التغليف عنصر مهم جدا ‏لان ده مدخل ، كل ما التغليف يكون معمول بعناية و فتحه سهل تجربة الاستمتاع بدايتها بتكون احلي، ركز ف تاريخ الصنع طبعا، و عادة المصنوعة لمناسبة ‏مثلا بيكون سعرها اقل بس نفس الجودة، و كاقاعدة التغليف الحلو اوي بيكون جواه شوكلاتة حلوة، بس طبعا الوزن و المحتوي مهم، مش فلوسك تروح ع العلبة  ‏و من جوة قطعتين تلاتة. نفترض بقي انك بتشتري شوكلاتة من محل مثلا باتشي، باشونيل، قويدر او اي محل بره و عايز تدوق، طبعا ده حق اصيل ليك ‏اوعي تنكسف و تتغاضي عنه، شرا الشوكولاتة تجربة لازم تكون حلوة ختي لو بتشتريها لحبايبك او حتي عامل دايت ، دوق الاول و جرب كل نوع لوحده ‏. طب تحكم ازاي؟ اولا شوف ورق التغليف لسه بلمعانه ولا لأ ، اللزق اللي عاليه ماسك كويس ولا واقع، التغليف من بره فضة و من جوه ورق زبدة ولا عادي ‏طبعا فضة دي مقصود بيها الفويل الخفيف، و لو ضهرها ورق زبدة دي حاجة طبعا ممتازة لانها بتحافظ ع الشوكولاتة حتي لو ساحت، لو ورق عادي م الداخل  ‏طعم الشوكولاتة هيغير، التغليف لو لسه بلمعانه معناه شوكولاتة اتعاملت باحترام و انها مش قديمة اوي، ابعد عن التغليف المفضض اللي ضهره فاضي ‏.

 دلوقتي بقي قررت تدوق ، اقطم حطة صغيرة ، نص عقلة صباع مثلا ، و حطها علي لسانك جوه بقك و لفها علشان تسيح جوه خاصة علي جانبي لسانك و شوف الطعم ‏و ممكن تغمض عينيك، مش عيب، استمتع بالتذوق، طبعا هي حتة صغيرة علشان السكر اللي فيها ما يضحكش عليك و ما تستطعمش كويس، لو فيها بندق، شوف طعمه ‏طازة ولا متخزن،جرب نوع تاني بنفص الطريقة لو الحشوة كبيرة تبقي قطمتك نص الشوكلاتية بالظبط علشان تعرف تدوق الحشو صح، اوعي تكون جعان وانت بتدوق ‏لانك هتاكلها كلها و تظلطها :) و هتدخل علي اللي بعدها. طبعا جرب كل الانواع و استطعم مش شرط تشتري كل اللي دوقته، المهم تشتري اللي عجبك ‏طبعا العبوات من اول نص كيلو و انت طالع دي بقي حاجة ترجعلك و ترجع لميزانيتك، بس من اول كيلو واحد ده المتعارف عليه زوقيا بين هدايا الناس  ‏اهتم قوي بالتغليف و لو التغليف النهائي مش حلو اطلب تغييره ، الشوكلاتة سلعة غالية و ده حققك، و تجربتها بتبدي من اول حلاوة التغليف ‏طبعا كل الشوكلاتات بتزود الوزن علشان كجه في نيوتريشن فاكتس لكل قطعة، الدارك شوكوليت تعرف انها مناسبة اكتر للدايت، بس اتا شخصيا مش غاويها بس ‏هي ازواق ، بس لو من جوديفا هدوقها طبعا :) . لة بتشتري شوكليت بار بقي نفس الكلام اللي قلنا من ناحية التغلييف، بس طبعا عندك انواع اكتر ومكونات ‏و نصيحة اشتر منها قوالب صغيرة لو بتجرب لاول مرة النوع و الماركة ، علشان اوقات الكبيرة اوي بتطلع مقلب، يعني نوّع احسن.  ‏و انت ف بيتك بقي، طلع الشوكولاتة م التلاجة و سيبها ربع ل نص ساعة لأن الشوكولاتة طعمها بيتغير و هي ساقعة و بتبقي ناشفة و بالتالي هيكون ‏كل همك تكسرها و تقرقشها مش تاكلها. بعد ما بقيت ف درجة حرارة الغرفة لو هتاكلها مع حبايبك، بلاش بعد الاكل علي طول ايديها كده نص ساعة، طبعا ‏ما بقولش لك ما تحليش، لكن انت بتستمتع ، ف خلي جسمك ياخد وقت ف هضم الاكل قبل ما تبدا رحلة الاستمتاع بالشوكولاتة، و كل ما كان متاخر بعد الاكل  ‏كل مكان احسن. طبعا كلها براحتك بس استمتع بقي و اهم اهم حاجة بقي قبل ما تبدأ الاستمتاع هات جنبك كباية ميه مليانة و بعد كل قطمة او قطعة ‏اشرب شوية ماية علشان تععمل بلانس لحاسة التذوق، و جرب تخلي القطعة ف بقك شوية قبل ما تمضغها، هتلاقي احساس تاني، استمتع بالتجربة كلها و ياريت ما تتكلمش و انت بتاكلها او بتبص علي موبيل او تلفيزيون، استمتع بالدقيقتن دول مع الشوكولاتة و خالي حاسة التذوق هي المسيطرة و بألف هنا. بس كده

فن الاستمتاع بالحياه : الجزء الاول - الموسيقي

مقدمة:

‏بمناسبة ان اليوم لسه بيبتدي: يا تري الواحد فعلان عارف يستمتع ب حياته؟ مش مسئلة فلوس كتير و مقتنيات ، هي مسئلة عارف تعمل كل حاجة بحب و شغف؟ ‏عارف لما تحب تسمع حاجة فعلان بتعرف تعيش الموود، او لما تروح مطعم بتعرف تستمتع بالاكل، لما بتروح تشتري عطر بتعرف تستمع بوقت الاختيار ؟ ‏لما بتسافر بتعرف تستمع بوقتك حتي ف المطار او الطيارة؟ لما بتروح تشتري شوكلاته ليك او هدية بتعرف تستمتع بلحظات التذوق و الاختيار، موضوع كبير 

‏‏طب انت عارف فعلان ايه اللي بيبسطك وازاي يبسطك، ايه اللي بيشجعك ويغير موودك ، طب وازاي تغطس ف الحاجة اللي بتحبها زي ما تغطس ف المخدة علشان تنام ‏؟ الاسئلة دي لازم كل واحد يسئلها لنفسه ولو عنده اجابة يتعمق ف تحدي الاجابة . عن تجارب شخصية الموضوع مش سهل، ممكن نبتدي بتجربتك ف سماع الموسيقي

فن الاستمتاع بالموسيقي و الأغاني 

‏لو سمعت اغنية بتعجبك هتعمل ايه علشان تستمتع بيها اوي، سماعات ف ودانك ولا ف اوضة لوحدك، هتغمض عينيك وتخفف الاضاءة ولا تسمعها ساوند سيستم. ‏هتسمع الاغنية و انت قاعد ع الكرسي وولاوع السرير و لا هتقوم و تتمايل علي الحانها ، هتردد كلمها ف سرك ولا بصوت ، هتغنيها لنفسك ولا للي حواليك ‏هتفصل التليفون لحد ماالاغنية تخلص، هتقفل الباب عليك، هتعلي الصوت، هتفكر فيها كأنها بتتغني ليك، هتعرف تهيء الظروف حواليك انك تندمج بكل كيانك ‏جرب مرة تكون اجابتك علي كل الاسئلة دي ب ايوه هعمل كده سواء مع اغنية بتحبها او موسيقي جرب بجد تعمل ده كله تفضي مخك تماما و انت بتعيش اللحظة دي  . ‏كيفن كوستنر ف فيلم for love of the game كان بيمارس ده كلاعب بيسبول اول ما بيدخل الملعب بيقول لنفسه silence علشان مايسمعش صوت جماهير تشتته ‏و ده نوع من انواع الاندماج للتركيز ، حتي الطرق الصوفية بتعتمد علي الاندماج. تصور بقي لما تندمج تماما ف حاحة بتحبها و هدفك تستمتع بيها لدقائق . ‏و ده نوع من انواع الاندماج للتركيز ، حتي الطرق الصوفية بتعتمد علي الاندماج.

تصور بقي لما تندمج تماما ف حاحة بتحبها و هدفك تستمتع بيها لدقائق  ‏لو قدرت تعمل كده انك تحصل علي درجة عالية م الاستمتاع بحاجة بتحبها هتشعر بعد ما خلصت الحاجة دي بسعادة نفسية عالية جدا، هتشعر انك ملك نفسك ‏متحكم ف وقتك قادر علي استعادة توازنك بنتهي السرعة، قادر تطلع طاقة ايجابية مهما كنت محاط بسلبيات.مجرد سماع موسيقي او اغنية بالطريقة دي تاثيره ‏بيكون قوي جدا ، طبعا  ده جزء بسيط من فن الاستمتاع بالحياة ركزت عليها لان الموسيقي غذاء روحي رهيب ، في حاجات تانية كتير ممكن تستمتع بيها برضه .